【DSE海外升學｜各國海外升學移民途徑】
唔少人去外國讀書，除咗為見識外，都會都順便爭取一個外地移民機會。英國、澳洲、美國、加拿大等國家都各自有自己嘅移民政策，供曾經到當地讀書嘅留學生留低發展事業。要選擇一個移民國家，有唔用因素要考慮，包括自己有興趣修讀學科嘅當地就業前景，收入，當地天氣等。去外國留學之後再移民嘅好處，就喺俾自己一個喺當地生活一段時間嘅機會，再因應自己當地生活經驗再去決定自己適唔適合移民當地，比投資移民等風險無咁高，所以讀書移民不失為一個好方法！以下係簡單列明升學移民嘅途徑俾大家作一個對比：
英國升學移民方法
如果同學係英國國民（海外）護照（BNO）嘅持有人，你就可以直接係英國逗留五年，係呢段時間內讀書。只要每年唔離開英國超過180日，五年後可以直接申請無限期居留權Indefinite Leave to Remain（ILR)。得到ILR 內只要一年期間唔離開英國超過90日，就可以直接申請入籍成為 British Citizen架啦！
如果同學唔係BNO嘅持有人，可以先申請英國留學簽證，然後完成你嘅大學學位。係英國大學畢業後，有意繼續居英嘅人士需要得到畢業簽證（Graduate Visa）而呢個工作簽證係需要你搵到工作之後得到你嘅僱主擔保。完成兩年嘅 Graduate Visa 後就可以申請另一個工作簽證（Skilled Worker Visa）架啦！Skilled Worker Visa 一般有效期長達5年，並且年薪要達到某個水平。五年後就同學就可以申請 Indefinite Leave to Remain，完成後就可以申請入籍～
澳洲升學移民方法
澳洲政府舊年就推出左為香港人而設嘅「避風港Hong Kong Stream」政策，呢個政策令香港人更容易移民澳洲。依家持BNO或香港特區護照人士，只要持有特定嘅工作簽證(457或482)或畢業生簽證(485)滿4年，就可以申請獨立技術移民簽證(189)。或在指定偏遠地區居住、工作及進修滿3年，便可以申請偏遠地區技術移民簽證(191)。
換句話講，只要你係澳洲讀大學，完成學位之後申請畢業生簽證，留低工作滿4年後便可以申請189簽證永久居留澳洲架啦！
美國升學移民方法
移民美國主要有四大個途徑，分別係技術移民、投資移民、親屬移民同埋抽籤移民。留學生主要係靠技術移民呢個途徑得到綠卡。要注意嘅係你喺美國留學並不代表一定可以攞到綠卡，如果畢業之後有僱主聘請嘅話就可以根據自己嘅學科同埋專業申請臨時工作簽證，一邊工作，一邊申請綠卡啦！
加拿大升學移民方法
加拿大喺2021年中推出左兩個新嘅移民方案，大大增加左成功移民嘅機會！其中Stream A嘅申請人只要係加拿大政府認可嘅院校畢業，完成學位課程、二年制或以上文憑課程，或完成至少一年研究生課程後，就可以於畢業嘅三年之內申請簽證（需要係加拿大境內完成最少一半嘅課程），成為永久居民。
